«Аю-тас» балалар сауықтыру лагерінде экологиялық мәдениетті қалыптастыруға, қауіпсіздік дағдыларын дамытуға және тәрбиеленушілер арасындағы достық қарым-қатынасты нығайтуға бағытталған мазмұнды әрі қызықты күн өтті.

Күннің бірінші жартысында балалар «Таза Қазақстан» экологиялық акциясына белсене қатысты. Тәрбиеленушілер сенбілікке шығып, лагерь аумағын тазалап, қоқыс жинап, айналаны абаттандыру жұмыстарына атсалысты. Балалар тазалық пен тәртіп әр адамның өзінен басталатынын тағы бір мәрте дәлелдеді.

Осы күні лагерьге төтенше жағдайлар қызметінің мамандары келді. Аға жасақтар үшін су айдындарындағы қауіпсіздік ережелеріне арналған танымдық кездесу ұйымдастырылды. Мамандар жаз мезгілінде судағы қауіпсіздік шаралары туралы түсіндіріп, қауіптің алдын алу жолдарын айтып берді және тақырыпқа байланысты бейнематериалдар көрсетті.

Кездесуден кейін тәрбиеленушілер профилактикалық акцияға қатысып, жағажайда демалушыларға судағы қауіпсіздік ережелері жазылған ақпараттық жадынамалар мен парақшалар таратты. Сонымен қатар балаларға құқық бұзушылықтың алдын алу мәселелері түсіндіріліп, белгілі мультфильм кейіпкерлерінің әрекеттері арқылы заңға қайшы әрекеттердің салдары жөнінде әңгіме жүргізілді.

Күннің жарқын қорытындысы ретінде лагерьде «Ғашықтар күні» атты жалпылагерьлік іс-шара өтті. Күні бойы «Махаббат поштасы» жұмыс істеп, әрбір қатысушы достарына немесе жақын адамдарына анонимді түрде немесе өз есімін көрсетіп, жылы лебіздер мен валентинкалар жолдай алды.

Кештің басты оқиғасы жауапты жасақтың бір жұбына арналған символикалық «үйлену тойы» болды. Қалған жасақтар «жас жұбайларға» арнап ән айтып, би билеп, қызықты көріністер қойып, шығармашылық сыйлықтарын ұсынды. Барлық өнер көрсетулер көрермендердің ыстық ықыласына бөленіп, ерекше көңіл-күй сыйлады.

Іс-шара барысында тәлімгерлер тәрбиеленушілерге «Махаббат поштасы» арқылы жолданған валентинкаларды табыстады. Жылы тілектер мен шынайы лебіздер мерекеге ерекше әсер беріп, достық пен сыйластықтың маңызын айқындай түсті.

Іс-шара қорытындысы бойынша белсенді қатысушылар мен шығармашылық ұжымдар белсенділігі, креативтілігі және жарқын өнер көрсетулері үшін грамоталармен марапатталды.

Күн соңында көңілді дискотека ұйымдастырылып, балалар би билеп, көтеріңкі көңіл-күй мен жарқын эмоцияларға бөленді.

Бұл күн тәрбиеленушілерге көптеген жағымды әсер сыйлап, лагерь өміріндегі ұмытылмас сәттердің біріне айналды.